طــوقتني يا سيــدي بالشــرف طــوق        
               يــاعِــزْ راســي يا ولـــد تــاج راسـي
سلطان ما يمشي على الأرض مخلوق       
               مثــلـك يمــاري طيــب راسٍ وباسـي
من كل مجـــدٍ ماخــذ الطــاق مطبوق       
               طيــب ووفــا وأبلـج حجاج وسياسـي
ولو تلمس بكفك على الأرض من فوق       
               تفجـــرت ينبـــوع عقـــب اليـباســي
انت الـدوا للي من الــوقت به عـــوق       
               وانت النعـــاس لعين جافي النعاسـي
وانت بزمانك مجـــد ماهــوب ملحوق       
               فيــك المعــالي شــامخـاتٍ رواســي
لك في الكــرامة حِبْ عاشق ومعشوق       
               ولك في الشجاعة من معزِّي مَـراسي
ولك في الوفـــا طبعٍ يسوقك له الشوق        
               ماهـوب يــومٍ تذكـــر ويــوم نـاسـي
ولك في الكرم من بِدْ خلق الله طروق       
               عنــا بهـــا الشــادي بليلٍ غـلاسـي
يدري بها الراعي على جرة النــوق           
               وتـــدري بها الحكام لَيِّن وقــاسـي
من طاب مَرَّه يرفع الراس ويتــوق           
               يمشـــي على البيدا بفخـر وحماسي
وانتــه بطيبــك كل يــومٍ لك بـروق           
               الطيــب والله فيــك يـا عِــزْ راسـي