لا باس ياقــلبٍ من الحــب منـــلاع       
               صــابه من اشغــاف المـحبين لوعه
يكفخ مثل طيــرٍ على الخِرْب طلاع       
               ونفسه على ذبـح الحـبارى بـــتوعه
من كف صقــارٍ على السبــق مَنـَّاع   
               ابطـــى عليه بهـــدته في طـــلوعه
يومي جناحه وأزرق العرف بالقاع       
               واليـــوم ثانــي ما تعــشـَّى بجــوعه
سلمـان قلبك من هوى الغيد نــزاع       
               والنفس دايم في هوى القلب طوعه
مشغـلك علـمٍ تو مانــاش الاسمــاع   
               من يوم جاك وصــايبـك منه روعـه
يطويك رايــك والهواجـيس شِــرَّاع       
               والعين من شوف الخلايق جزوعه
ما لك بديرة غيـرك اليــوم مــرباع       
               واللي مضى يالقرم صعبٍ رجوعه
دلِّه ضميــرك لين يمـشي بالاسـناع       
               وطــرد المقَفِّــي لا يجيلك سنــوعه