اوقــد شموعه في رجا شوف خِلّه       
               يضوي سَنا شمع الهوى ليل الاحباب
هــذا الوعــد والـقلــب قـامت تِتلَّه       
               مشـــاعرٍ من بيــن صـــادق وكـذاب
يـقبــل ويقـفــي ويتـفـقــد مـحـلــه   
               ويجمــع سواليــفه وعيــنه على الباب
ياطــول وقت المحتــري فيـه مَلَّه       
               ومن الهقــاوي يجــرح الشِفَّــه النـاب
متى يجــي ياليــت يصـــدق لعله       
               متى بشــوفه جمـــر الاشـــواق لهـاب
خفقــات قلبــه تنقــل الشـوق كله       
               وخيــاله استرســل على حـلــم خـلاب
استسلـــم من الغيــظ للــي يدلــه       
               حتى ولــو حلمٍ .. على شـرط .. جذاب
شافــه بقلبٍ ساطــي الشوق عَلـَّه
               يا فــرحة المشـتـــاق لاشـــاف غيــاب
هو صدق جاني يسبق النور ظِله؟       
               يا كثــر مــا دورت له عـــذر واسبـاب
من فرحــته كنــه وطا درب زَلـَّـه       
               ضـــاع الكـــلام ولا تــلاقن الاهــداب
يروي عطش عينٍ لشـوفه مِـغلّـه       
               والصمت في بعض المواقف عن كتاب
كلٍ بعيـنـه سيــف شـوقــه يســله       
               نظــراتـهـم من بينـهم شـــوق وعتــاب
في شـوفته له يــابس الريــق بَـلّه       
               تــوه ركـــد قلبــه وتــو السهــر طــاب
يوم انتـبه نشــوان مـن غفــوةٍ له       
               يــدوّر اللي شــاف في الحـلــم مرتــاب
لين الشمـــوع دموعهــا مستـهله       
               ما به حـبــيــب ولا تـــدور للاحــبـــاب